Հայաստանի Հանրապետության վարչապետ Նիկոլ Փաշինյանը մասնակցել է ԱՄՆ նախագահ Դոնալդ Թրամփի կողմից հիմնադրված Խաղաղության խորհրդի անդրանիկ նիստին, որը տեղի է ունեցել Վաշինգտոնում։
Միջոցառմանը ներկայացել են խորհրդին անդամ երկրների ղեկավարներ, վարչապետներ և արտաքին գործերի նախարարներ։ Հայաստանը ներկայացրել են վարչապետ Նիկոլ Փաշինյանը և արտաքին գործերի նախարար Արարատ Միրզոյանը։
Իր ելույթի ընթացքում ԱՄՆ նախագահ Դոնալդ Թրամփը խոսել է միջազգային հակամարտությունների մասին՝ անդրադառնալով նաև Հայաստան-Ադրբեջան հակամարտությանը։ Նա նշել է, որ 32 տարվա հակամարտությունից հետո երկու երկրների ղեկավարները զգալի ջանքեր են գործադրել խաղաղության հաստատման ուղղությամբ։ ԱՄՆ նախագահը շնորհակալություն է հայտնել Նիկոլ Փաշինյանին և Ադրբեջանի նախագահին՝ ընդգծելով կատարված աշխատանքի արդյունքների կարևորությունը։
Նիստի շրջանակում վարչապետ Նիկոլ Փաշինյանը կարճատև զրույցներ է ունեցել մի շարք երկրների գործընկերների հետ։ Խորհրդի ընթացքում ներկայացվել է նաև Գազայի խաղաղության ծրագիրը և առաջիկա քայլերի մասին տեղեկատվությունը։
Այս նիստը համարվում է խորհրդի գործունեության մեկնարկային միջոցառումը, որի նպատակն է խթանել խաղաղության հաստատման և միջազգային լարվածության ցածրացման գործընթացները։
