Ստեփանավան քաղաքի կոմունալ բաժնի 70-ից ավելի աշխատակից արդեն երկու ամիս է՝ չեն ստանում իրենց աշխատավարձը։ Այս հարցը, որը հասունացել է մինչև անելանելի վիճակ, պահանջում է անհապաղ ուղղակի միջամտություն՝ հատկապես այն պայմաններում, երբ հենց այդ մարդիկ են ապահովում քաղաքի մաքրությունը, որը դարձել է Ստեփանավանի այցեքարտը։
Այս իրավիճակը հատկապես ցնցող է, քանի որ այս աշխատակիցներից շատերը, այդ թվում՝ մեծահասակներ, ովքեր պետք է արդեն թոշակ ստանային, սոցիալական պայմաններից ելնելով շարունակում են ծառայել քաղաքին։ Նրանք, ովքեր ամեն օր, նույնիսկ ամենացուրտ եղանակին, պարտադիր պարտքով ապահովում են մեր քաղաքի մաքրությունը, այսօր հայտնվել են իրենց աշխատանքի արդյունքով վաստակած գումարը ստանալու հնարավորությունից զրկված վիճակում։
Ստեփանավանի քաղաքապետ Արմեն Գրիգորյանի պարտականությունն է, որպես քաղաքի ղեկավար, ապահովել իր քաղաքացիների, այդ թվում՝ կոմունալ ծառայության աշխատակիցների իրավունքները։ Քաղաքապետը պետք է հիշի, որ երբ քաղաքը հյուրեր է ընդունում, առաջին հերթին հպարտություն է ներշնչում հենց այդ մարդկանց աշխատանքը, որոնց շնորհիվ Ստեփանավանը ներկայացվում է որպես մաքուր և հարմարավետ քաղաք։
Այս հարցի լուծումը կարևոր նշանակություն ունի նաև Լոռու մարզպետ Արեն Մկրտչյանի համար։ Նա, որը վերջին շրջում ցուցաբերել է իր արդյունավետության և մարդկային մոտեցման օրինակներ՝ արագ արձագանքելով մարզի բնակիչների կողմից բարձրացված խնդիրներին, կարող է այս հարցում ևս ցուցաբերել իր լիդերական որակները։ Կարճ ժամանակում մարզպետը կարող է միջամտել և ապահովել, որպեսզի մարդիկ իրենց արդար աշխատավարձը ստանան։
Այս իրավիճակը նաև հիշեցնում է Ստեփանավանի նախկին քաղաքապետ, երջանկահիշատակ Միքայել Ղարաքեշիշյանի ժամանակաշրջանը, երբ նման խնդիրներ չէին առաջանում։ Նրա ժառանգությունը, որը ներկայիս քաղաքապետը շարունակում է զարգացնել, պետք է լինի ոչ միայն նոր կանաչ գոտիներ և բարեկարգված ճանապարհներ, այլև իր քաղաքացիների նկատմամբ պատվեր և հոգատարություն։
