«Իմ քայլը» հիմնադրամի կայքում հրապարակված տվյալների համաձայն՝ 2025 թվականը հիմնադրամի համար բարեբեր է եղել նվիրատվությունների տեսանկյունից։
Ամենախոշոր նվիրատվությունը՝ 20 միլիոն դրամը, կատարել է զենքի և զինամթերքի արտադրությամբ զբաղվող «Արսենալ լտդ» ՍՊԸ-ն։ Այս ընկերությունը, որը գրանցվել է 2017 թվականից, պատկանում է Ստանիսլավ Բեկովին և Կարինա Ղազարյանին։ Նմանատիպ նվիրատվություն «Արսենալ լտդ»-ն արել էր նաև 2023-2024 թվականներին։
Հաջորդ խոշոր նվիրատուն՝ 10 միլիոն դրամով, «Ջերմուկ գրուպ» ՓԲԸ-ն է, որը պատկանում է Աշոտ Արսենյանին։ Այս ընկերությունն էլ իր հերթին նվիրատվություն էր կատարել 2023-2024 թվականներին։
Ցանկում նշված է նաև «Ջեյ Էֆ Թի» ՍՊԸ-ի 10 միլիոն դրամի փոխանցումը։ Բացի այդ, «Մարկո» ՍՊԸ-ն նվիրատվություն է կատարել 2 միլիոն դրամի չափով։
Հիմնադրամին նվիրատվություն են կատարել նաև այլ ընկերություններ և անձեր։ Խաչատուր Սուքիասյանին, նրա ընտանիքին պատկանող Սուքիասյան հիմնադրամը նույնպես 10 միլիոն դրամ է փոխանցել։ Գործարար Սամվել Ալեքսանյանի ընտանիքին պատկանող Mobile centre հեռախոսների վաճառքով զբաղվող «Մոբայլ սենթր արթ» ՍՊԸ-ն նույնպես նվիրաբերել է 10 միլիոն դրամ։
Այլ նվիրատուների թվում են Էջմիածնի սարքաշինական գործարանը (250.000 դրամ), շվեյցարահայ Վարդան Սիրմաքեսին պատկանող «ԱՐՄՍՎԻՍԲԱՆԿ» ՓԲԸ-ն (1 միլիոն դրամ) և «Սիգնիֆիքնթ» ՍՊԸ-ն (2 միլիոն դրամ), որը պատկանում է Արկադիկ Գրիգորյանին։ Ցանկում առկա է նաև «Ախթալայի լեռնահարստացման կոմբինատ» ՓԲԸ-ի ավելի քան 10 միլիոն դրամի նվիրատվությունը։
Բացի այդ, հիմնադրամի ցանկում առկա են 8 անանուն նվիրատվություն, որոնցից 4-ը՝ 20 միլիոնական դրամի չափով, իսկ մյուս 4-ը՝ 10 միլիոնական են։
Հիշեցնենք, որ «Իմ քայլը» հիմնադրամը ստեղծվել է 2018 թվականին՝ իշխանափոխությունից հետո։ Այսօր հիմնադրամի գործադիր տնօրենն է Նիկոլ Փաշինյանի կինը՝ Աննա Հակոբյանը։
