Այսօր Գյումրիում պաշտոնապես մեկնարկեց «Միասնության թևեր» քաղաքական ուժի նախընտրական քարոզարշավը։ Ուժի ներկայացուցիչներն ու համակիրները երթ իրականացրեցին քաղաքի կենտրոնական փողոցներով, որից հետո փոքրիկ հանրահավաք կազմակերպվեց Գյումրու Թատերական հրապարակում։
Բարձրախոսով դիմելով հավաքված գյումրեցիներին՝ կուսակցության վարչապետի թեկնածու Արման Թաթոյանը հստակ հայտարարեց, որ Հայաստանում չկա որևէ խնդիր, որը հնարավոր չլինի լուծել սեփական ուժերով և միասնականությամբ։ Նա նշեց, որ հայ ժողովուրդը հզոր է և ունակ, և այդ հզորությունը պետք է ուղղել երկրի ներսում։
«Մենք հզոր ու ուժեղ ժողովուրդ ենք, ամբողջ աշխարհում ունենք հայրենակիցներ ու հարցեր ենք լուծում ողջ աշխարհում, հետևաբար չենք կարող թույլ տալ, որ գան մեզ պարտադրանքներ անեն»,- ընդգծեց Թաթոյանը՝ հորդորելով քաղաքացիներին պարտադիր գնալ ընտրությունների։ Նա նաև հակադրեց երկրի ապագայի որոշումը երկրի ներսում կայացնելու կարևորությունը՝ այն դրսից, օրինակ՝ Մոսկվայից կամ Բաքվից։
Կուսակցության ծրագրի հիմնական կետերից մեկը Գյումրու վերածումն է երկրորդ մայրաքաղաքի՝ իր բոլոր առավելություններով, ինչը համեմատելի է Մյունխեն-Բեռլին կամ Նյու Յորք-Վաշինգտոն համակարգերի հետ։ Թաթոյանը նախատեսում է քաղաքը վերածել տնտեսագիտական և մանկավարժական ուղղվածությամբ խոշոր համալսարանական կենտրոնի, իսկ «Շիրակ» օդանավակայանը դարձնել «Զվարթնոցին» լիարժեք մրցակից՝ ավիատոմսերի գները նվազեցնելու նպատակով։
Անդրադառնալով Շիրակի մարզում աղքատության բարձր մակարդակին՝ Թաթոյանը խոստացավ հատուկ ծրագրով քաղաքացիներին ազատել վարկային գերությունից։ Գյուղատնտեսության զարգացման համար նախատեսվում է սահմանել ոռոգման և խմելու ջրի սիմվոլիկ գումարներ, ներդնել մթերման կայաններ, ինչպես նաև բացառել դպրոցների փակումը, հատկապես՝ սահմանամերձ համայնքներում։
Քարոզարշավի ընթացքում քաղաքական ուժի ներկայացուցիչները հանդես եկան «Հունիսի 7-ին ընտրենք 6-ին, որ ջախջախենք 16-ին» կարգախոսով։ Թեկնածուն նաև ընդգծեց, որ իր համար առաջնայինը Հայաստանի անվտանգությունն է, և «անկլավներ գոյություն չունեն»։ Նա կարևորեց Ռուսաստանի հետ հարաբերությունների պահպանումը՝ նկատելով, որ տասնյակ հազարավոր հայեր այնտեղ մեկնում են արտագնա աշխատանքի։
Կուսակցությունն առաջարկում է երեք հիմնասյուն երիտասարդներին հայրենիքում պահելու համար՝ ապահով կյանք ու լավ կրթություն, բարձր վարձատրվող աշխատանք և ազգային ինքնության պահպանում։
